Pakem Maddhu Alampa’aghi Tarèka “Ngajhum Bhângsa Matombu Bhâsa”
Mekkasân/29/11/2023. Yayasan Pakem Maddhu Bhâḍhi alampa’aghi tarèka
addhuwân ennem kompetensi bhâsa Madhurâ. Èyantarana bâḍâ addhuwân
Tembhâng Macapat, Nyerrat Carakan Madhurâ, Puisi Madhurâ, Dhungngèng
Madhurâ, pidato, sareng lawakan tunggal (stand up comedy). Addhuwân
kasebbhut ghâḍhuwân tojjhuwân ka’angghuy makoko kompetensi ghuru neng
biḍâng kasebbhut. Addhuwân kasebbhut èyèrèngè ghuru sa Madhurâ, ngabidhi
onḍhâghân TK/PAUD, SD/MI, SMP/MTs, sareng SMA/MA/SMK sa Madhurâ.
Lalampa’an
sè èyajhum neng partèngkan ngèmodhi arè bhâbhârrèpon Mekkasân sè kapèng
493 sè engghunnèpon neng Manḍhâpa Aghung Ronggosukowati aropa’aghi
kaghâtèyanna Yayasan Pakem Maddhu è ḍâlem arabât tor mèyara bhâsa
Madhurâ neng sakobhengnga penḍiḍighân è kabhupatèn Mekkasân.
È ḍâlem ḍhâḍhâbuwânna katowa Yayasan Pakem Maddhu Moh Hafid Effendy sè èsambhât Hafid angrasa cè; ghumbhirâna è ḍâlem lalampa’an ghâpanèka, asabâb kaghâtèyanna ru-ghuru sa Madhurâ è ḍâlem arabât bhâsa sareng sastra Madhurâ. Salaèn ḍâri ghâpanèka, sala sèttong pangareb Katowa Pakem Maddhu ḍâ’ sadhâjâna ghuru. Kadhiponapa para ghuru ka’angghuy areng-sareng mèyara tor majhurbhu bhâsa sareng sastra neng è sakobhengnga sakola’an sareng sakobhengnga kalowarga. Sabâb ghuru aropa’aghi pamongkas è ḍâlem arabât tor makoko bhâsa Madhurâ.
Salaèn ḍhâḍhâbuwân kasebbhut, Bâpa’ Kusairi mènangka pongghâbâsè makkèla Bapa’ PJ Bupati jhughânan aparèng pangarep ḍâ’ sadhâjâna ghuru, sopajâ mèyara bhâsa tor matombu bhâsa neng pendidighân kabhupatèn Mekkasân. Parlona addhuwân ka’ḍinto namong masèttong atèna ghuru sopajâ ta’ cokbâ sè matombhu bhâsa neng polo Madhurâ.
Addhuwân sè èyèrèngè 103 Ghuru samadhurâ aropa’aghi tarèka sè sanget langkong parjhughâ. Malar moghâ sadhâjâna ghuru teptebbhâ ngaghungè kakowadhân tor song-osong lombhung ka’angghuy mèyara bhâsa sareng sastra Madhurâ neng penḍiighân è Kabhupatèn Mekkasân ghâpanèka.